ଓ୍ବାଶିଂଟନ : ଆମେରିକା-ଇରାନ ସଂଘର୍ଷକୁ ବିତିଲା ୬ ମାସରୁ ଅଧିକ, ଏବେ ବି ଜାରି ରହିଛି ତିକ୍ତତା। ଫେବୃଆରୀ ୨୮ ରେ ଆମେରିକା ଏବଂ ଇସ୍ରାଏଲ ଇରାନ ଉପରେ ମିଳିତ ଆକ୍ରମଣ କରିବା ପରଠାରୁ ମଧ୍ୟ-ପୂର୍ବ ଅଞ୍ଚଳରେ ଯୁଦ୍ଧ ଜାରି ରହିଛି।
ଆମେରିକା ଏବଂ ଇରାନ ପରସ୍ପର ଉପରେ ଆକ୍ରମଣ ଜାରି ରଖିଛନ୍ତି। ଏହି ପରିପ୍ରେକ୍ଷୀରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ସଂଘର୍ଷ କେବେ ଶେଷ ହେବ ସେ ନେଇ ଏକ ପୂର୍ବାନୁମାନ କରିଛନ୍ତି।
ବୁଧବାର ରାଷ୍ଟ୍ରପତି ଟ୍ରମ୍ପ କହିଛନ୍ତି ଯେ, ତାଙ୍କ ବିଶ୍ୱାସରେ ନଭେମ୍ବର ମାସରେ ହେବାକୁ ଥିବା ଆମେରିକାର ମଧ୍ୟ-ଅବଧି ନିର୍ବାଚନ ପରେ ଇରାନ ସହ ଚାଲିଥିବା ସଂଘର୍ଷ ଶେଷ ହେବ। ଟ୍ରମ୍ପ ତେହରାନ ଉପରେ ନିର୍ବାଚନକୁ ପ୍ରଭାବିତ କରିବାକୁ ଚେଷ୍ଟା କରୁଥିବାର ଅଭିଯୋଗ ମଧ୍ୟ କରିଛନ୍ତି।
ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ଟ୍ରମ୍ପ କହିଥିଲେ, ‘ମୁଁ ଭାବୁଛି ନିର୍ବାଚନ ପରେ ହିଁ ଏହି ଲଢ଼େଇ ଶେଷ ହେବ କାରଣ ଇରାନ ଆଉ ଅଧିକ ସମୟ ପର୍ଯ୍ୟନ୍ତ ଏହାକୁ ଜାରି ରଖିପାରିବ ନାହିଁ।’
ତଥାପି, ଆମେରିକାର ଅଧିକାରୀମାନଙ୍କୁ ଉଦ୍ଧୃତ କରି ‘ଦି ୱାଲ ଷ୍ଟ୍ରିଟ ଜର୍ଣ୍ଣାଲ’ ରିପୋର୍ଟ କରିଛି ଯେ ଟ୍ରମ୍ପଙ୍କ ବରିଷ୍ଠ ପରାମର୍ଶଦାତାମାନେ ବ୍ୟକ୍ତିଗତ ଭାବେ ଚେତାବନୀ ଦେଉଛନ୍ତି ଯେ ଏହି ସଂଘର୍ଷ ତାଙ୍କ କାର୍ଯ୍ୟକାଳର ବାକି ଥିବା ଦୁଇ ବର୍ଷ ପର୍ଯ୍ୟନ୍ତ ଚାଲିପାରେ।
ୱାଶିଂଟନ ଇରାନକୁ ଅର୍ଥନୈତିକ ଦୃଷ୍ଟିରୁ ଏକଘରକିଆ କରିବାକୁ ଚେଷ୍ଟା କରୁଛି। ଏହି ସମୟରେ, ବୁଧବାର ‘ଆନ୍ତର୍ଜାତୀୟ ପରମାଣୁ ଶକ୍ତି ସଂସ୍ଥା’ ର ବୋର୍ଡ ଅଫ ଗଭର୍ଣ୍ଣର୍ସ ଏକ ଭୋଟ ମାଧ୍ୟମରେ ଇରାନ ଦ୍ୱାରା ପରମାଣୁ ନିୟମାବଳୀ ପାଳନ ନ କରାଯିବା ପ୍ରସଙ୍ଗକୁ ‘ଜାତିସଂଘ ସୁରକ୍ଷା ପରିଷଦ’କୁ ପଠାଇବାକୁ ନିଷ୍ପତ୍ତି ନେଇଛି।
ଏହାକୁ ତେହରାନ ଉପରେ ଚାପ ବୃଦ୍ଧି କରୁଥିବା ଏକ କୂଟନୈତିକ ପଦକ୍ଷେପ ଭାବରେ ବର୍ଣ୍ଣନା କରାଯାଇପାରେ। ଏଏଫପି (AFP)ର ଏକ ରିପୋର୍ଟ ଅନୁଯାୟୀ, ଏହି ପ୍ରସ୍ତାବଟି ୨୩-୩ ଭୋଟ ବ୍ୟବଧାନରେ ଅନୁମୋଦିତ ହୋଇଥିଲା ଏବଂ ଆଠ ଜଣ ସଦସ୍ୟ ଭୋଟ ଦେବାରୁ ବିରତ ରହିଥିଲେ। ରୁଷିଆ, ଚାଇନା ଏବଂ ନାଇଜର ଏହାର ବିରୋଧରେ ଭୋଟ ଦେଇଥିଲେ।
