ଦୁବାଇ : ଦୁବାଇରେ ଶକ୍ତିଶାଳୀ ବିସ୍ଫୋରଣ । ଆକାଶରୁ ଖସାଇ ଦିଆଗଲା ଶତ୍ରୁପକ୍ଷର ଡ୍ରୋନ୍ । ଦୁବାଇ ସ୍ଥିତ ଜେବେଲ ଅଲୀ ଶିଳ୍ପଞ୍ଚଳରେ ୨୦ ମିନିଟ୍ ମଧ୍ୟରେ କ୍ରମାଗତ ୭ଟି ବିସ୍ଫୋରଣ ଘଟିଥିବା ଖବର ସାମ୍ନାକୁ ଆସିଛି। ଏହି ବିସ୍ଫୋରଣର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ଯେଉଁଥିରେ ଆକାଶରେ କଳା ଧୂଆଁର ବାଦଲ ଘୋଟି ରହିଥିବା ଦେଖିବାକୁ ମିଳୁଛି। ମାତ୍ର ୨୦ ମିନିଟ୍ ଭିତରେ ପାଖାପାଖି ୭ଟି ଜୋରଦାର ବିସ୍ଫୋରଣ ଶୁଣାଯାଇଥିଲା।
ନାସାର ଥର୍ମାଲ୍ ଇମେଜ୍ ଅନୁଯାୟୀ, ବନ୍ଦର ନିକଟରେ ଇନ୍ଧନ ସଂରକ୍ଷଣ ଏବଂ ପରିବହନ ପାଇଁ ବ୍ୟବହୃତ ହେଉଥିବା ଏକ ୱେରହାଉସରେ ଭୟଙ୍କର ନିଆଁ ଲାଗିଯାଇଥିଲା। ଇରାକ ଗଣମାଧ୍ୟମର ଦାବି ଅନୁଯାୟୀ ଆମେରିକା-ଇରାନ ଏବଂ ୟେମେନର ହୁତି ବିଦ୍ରୋହୀଙ୍କ ମଧ୍ୟରେ ଚାଲିଥିବା ଉତ୍ତେଜନା କାରଣରୁ ଏହା ମିସାଇଲ୍ ଆକ୍ରମଣ ହୋଇପାରେ ବୋଲି ଆଶଙ୍କା କରାଯାଉଛି। ତେବେ ଏମିରେଟ୍ସ କର୍ତ୍ତୃପକ୍ଷଙ୍କ ପକ୍ଷରୁ ବିସ୍ଫୋରଣର ପ୍ରକୃତ କାରଣ ସମ୍ପର୍କରେ କୌଣସି ସ୍ପଷ୍ଟ ସରକାରୀ ସୂଚନା ଦିଆଯାଇ ନାହିଁ।
