ନୂଆଦିଲ୍ଲୀ : ଲକ୍ଷ୍ନୌରୁ ସୁଲତାନପୁର ଯାଉଥିବା ସମୟରେ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସୁରକ୍ଷା ଦଳରେ ଥିବା ଗାଡ଼ିଗୁଡ଼ିକ ପୂର୍ବାଞ୍ଚଳ ଏକ୍ସପ୍ରେସୱେରେ ହଲିଆପୁର ଥାନା ଅଞ୍ଚଳରେ ପରସ୍ପର ସହ ଧକ୍କା ହୋଇଛି। ଧକ୍କାରେ ଗୋଟିଏ କାରର ହୁଡ୍ କ୍ଷତିଗ୍ରସ୍ତ ହୋଇଥିବା କୁହାଯାଉଛି। ଦୁର୍ଘଟଣାରେ ଦୁଇ ଜଣ ଆହତ ହୋଇଥିବା ସୂଚନା ମିଳିଛି। ତେବେ ରାହୁଲ ସୁରକ୍ଷିତ ଅଛନ୍ତି। ସେ କୋର୍ଟ ଅଭିମୁଖେ ତାଙ୍କର ଯାତ୍ରା ଜାରି ରଖିଥିଲେ। ତାଙ୍କୁ ସୁଲତାନପୁରର ଏକ ସ୍ୱତନ୍ତ୍ର କୋର୍ଟରେ ହାଜର ହେବାର କାର୍ଯ୍ୟକ୍ରମ ରହିଛି।
ଦୁର୍ଘଟଣାର କିଛି ସମୟ ପରେ, ରାହୁଲ ଗାନ୍ଧୀ ୨୦୧୮ ମସିହାର ଏକ ଫୌଜଦାରୀ ମାନହାନି ମାମଲାର ରାୟ ପାଇଁ ସୁଲତାନପୁରର ଏକ ସ୍ୱତନ୍ତ୍ର ସାଂସଦ/ବିଧାୟକ କୋର୍ଟରେ ହାଜର ହେବା ପାଇଁ ଚାଲିଯାଇଥିଲେ।ପୁଲିସ କହିଛି ଯେ, ଏହି ଘଟଣାରେ କେହି ଗୁରୁତର ଆହତ ହୋଇନାହାନ୍ତି ଏବଂ ଲୋକସଭାରେ ବିରୋଧୀ ଦଳ ନେତା ସୁରକ୍ଷିତ ଅଛନ୍ତି। ରିପୋର୍ଟ ଅନୁଯାୟୀ, ସୋମବାର ସକାଳେ ରାହୁଲ ଗାନ୍ଧୀ ଲକ୍ଷ୍ନୌରୁ ସୁଲତାନପୁର ଯାଉଥିବା ସମୟରେ ପୂର୍ବାଞ୍ଚଳ ଏକ୍ସପ୍ରେସୱେରେ ତାଙ୍କ ସୁରକ୍ଷା ଦଳର କିଛି ଗାଡ଼ି ପରସ୍ପର ସହିତ ଧକ୍କା ହୋଇଥିଲା।
ଘଟଣାଟି ପୂର୍ବାହ୍ନ ପ୍ରାୟ ୧୦ଟା ୧୫ ସମୟରେ ଘଟିଥିଲା। ସ୍ଥାନୀୟ କଂଗ୍ରେସ ନେତାଙ୍କ ଗାଡ଼ିର ସାମ୍ନାରେ ଥିବା ଏକ ଘରୋଇ ଗାଡ଼ି ବ୍ରେକ୍ ଲଗାଇ ହଠାତ୍ ଅଟକି ଯାଇଥିଲା, ଯାହା ଫଳରେ ପଛରେ ଥିବା ଗାଡ଼ିଗୁଡ଼ିକ ଧକ୍କା ଖାଇଥିଲା। ପୁଲିସ କହିଛି ଯେ କିଛି ସମୟ ପରେ କାନଭୟ ସୁଲତାନପୁର ଅଭିମୁଖେ ଯାତ୍ରା କରିଥିଲା। ପୁଲିସ ଏସକର୍ଟ ମଧ୍ୟ ସୁରକ୍ଷା ଦଳ ସହିତ ଯାଇଥିଲେ। ଏହା ମଧ୍ୟ ଜଣାପଡ଼ିଛି ଯେ ମାନହାନି ମାମଲାର ଶୁଣାଣି ପାଇଁ ରାହୁଲ ଗାନ୍ଧୀ ସକାଳ ପ୍ରାୟ ୧୧ଟା ୧୫ ସମୟରେ ସୁଲତାନପୁର କୋର୍ଟରେ ପହଞ୍ଚିବାର କାର୍ଯ୍ୟକ୍ରମ ଥିଲା।
୮ ବର୍ଷ ପରେ ରାହୁଲ ଗାନ୍ଧୀଙ୍କ ବିରୋଧରେ ମାନହାନି ମାମଲାର ରାୟ ଆଜି ଆସିବ। ଏହି ମାମଲା ୨୦୧୮ କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ ବେଙ୍ଗାଲୁରୁରେ ଏକ ରାଲିରେ ବିଜେପି ଅଧ୍ୟକ୍ଷ ଅମିତ ଶାହଙ୍କ ବିରୋଧରେ ରାହୁଲ ଗାନ୍ଧୀ ଦେଇଥିବା ଆପତ୍ତିଜନକ ମନ୍ତବ୍ୟ ସହିତ ଜଡିତ।
