ଭୁବନେଶ୍ୱର : ସରକାରୀ କାର୍ଯ୍ୟାଳୟ ଓ ରାଜ୍ୟର ସମସ୍ତ ସରକାରୀ ଉଦ୍ୟୋଗ (PSU) ପାଇଁ ‘ନୋ ଗିଫ୍ଟ ପଲିସି’କୁ ପୁଣିଥରେ କଡ଼ାକଡ଼ି ଲାଗୁ କରିଛନ୍ତି ଓଡ଼ିଶା ସରକାର। ଏନେଇ ନଭେମ୍ବର ୫ ତାରିଖରେ ଅର୍ଥ ବିଭାଗ ପକ୍ଷରୁ ଏକ ଚିଠି ଜାରି ହୋଇଛି। ଅର୍ଥ ବିଭାଗର ପ୍ରମୁଖ ସଚିବ ସଞ୍ଜୀବ କୁମାର ମିଶ୍ର ସମସ୍ତ ବିଭାଗକୁ ଏହି ନିୟମର କଡ଼ାକଡ଼ି ଅନୁପାଳନ କରିବାକୁ ନିର୍ଦ୍ଦେଶ ଦେଇଛନ୍ତି। ନୂଆ ନିର୍ଦ୍ଦେଶ ଅନୁସାରେ, ଦୀପାବଳି ସମେତ ଅନ୍ୟ କୌଣସି ପର୍ବପର୍ବାଣୀରେ ଉପହାର କିମ୍ବା ଏ ସମ୍ପର୍କିତ ସାମଗ୍ରୀ କିଣିବା ପାଇଁ ସରକାରୀ ଅର୍ଥ ଖର୍ଚ୍ଚ କରାଯାଇପାରିବ ନାହିଁ। ଏହି ନିର୍ଦ୍ଦେଶ ସମସ୍ତ ଅତିରିକ୍ତ ମୁଖ୍ୟ ସଚିବ, ପ୍ରମୁଖ ସଚିବ, କମିଶନର-ତଥା-ସଚିବ ଏବଂ ବିଭିନ୍ନ ବିଭାଗର ସଚିବମାନଙ୍କୁ ଦିଆଯାଇଛି।
କେନ୍ଦ୍ର ସରକାରଙ୍କ ଅର୍ଥ ମନ୍ତ୍ରଣାଳୟ ଅଧୀନସ୍ଥ ବ୍ୟୟ ବିଭାଗ ୧୯ ସେପ୍ଟେମ୍ବର ୨୦୨୫ରେ ଏକ ଅଫିସ୍ ମେମୋରାଣ୍ଡମ୍ ଜାରି କରିଥିଲା। ଏଥିରେ ଦୀପାବଳି ଓ ଅନ୍ୟ ପର୍ବପର୍ବାଣୀରେ ସରକାରୀ ଅର୍ଥରେ ଉପହାର କିଣିବା ଉପରେ ରୋକ୍ ଲଗାଯାଇଥିଲା। ଏହାକୁ ଅନୁସରଣ କରି ଓଡ଼ିଶା ସରକାର ୧୭ ଅକ୍ଟୋବର ୨୦୨୫ରେ ପ୍ରଥମଥର ପାଇଁ ଏହି ନୀତି ଆପଣାଇଥିଲେ। ଚଳିତ ବର୍ଷ ମଧ୍ୟ ଏହାକୁ ଜାରି ରଖିବାକୁ ନିଷ୍ପତ୍ତି ହୋଇଛି। ପର୍ବପର୍ବାଣୀ ନାଁରେ ଅନାବଶ୍ୟକ ଖର୍ଚ୍ଚ ରୋକିବା ଏବଂ ସରକାରୀ ଅର୍ଥର ସଠିକ୍ ବିନିଯୋଗ ସୁନିଶ୍ଚିତ କରିବା ଏହି ନୀତିର ମୁଖ୍ୟ ଉଦ୍ଦେଶ୍ୟ। ତେବେ ଏହି କଟକଣା କେବଳ ସରକାରୀ ଅର୍ଥରେ ଉପହାର କିଣିବା ଓ ସମ୍ପୃକ୍ତ ଖର୍ଚ୍ଚ ଉପରେ ଲାଗୁ ହେବ। ସାଧାରଣ ଲୋକଙ୍କ ବ୍ୟକ୍ତିଗତ ଉପହାର ଆଦାନପ୍ରଦାନ ଉପରେ ଏହା କୌଣସି କଟକଣା ନୁହେଁ। ସରକାରଙ୍କ ସ୍ପଷ୍ଟ ବାର୍ତ୍ତା ରହିଛି କି, ପର୍ବ ପାଳନ ହେଉ, କିନ୍ତୁ ଉପହାର ନାଁରେ ଖର୍ଚ୍ଚ ହେବନି ଜନସାଧାରଣଙ୍କ ଟଙ୍କା।
