ନୂଆଦିଲ୍ଲୀ :‘ବନ୍ଦେ ମାତରମ୍’ର ଛଅଟି ପଦ ଗାନକୁ ବାଧ୍ୟତାମୂଳକ କରୁଥିବା ଆଇନକୁ ଚ୍ୟାଲେଞ୍ଜ କରି ଆଗତ ଏକ ଆବେଦନ ଉପରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କଠାରୁ ଜବାବ ଲୋଡିଛନ୍ତି। କର୍ଣ୍ଣାଟକୀ କଣ୍ଠଶିଳ୍ପୀ ଟି.ଏମ୍. କୃଷ୍ଣା ଏହି ଆବେଦନ ଦାଖଲ କରିଛନ୍ତି। ବନ୍ଦେ ମାତରମର ଚାରୋଟି ପଦ ସ୍ପଷ୍ଟ ଭାବରେ ହିନ୍ଦୁ ଦେବତାମାନଙ୍କ ପ୍ରତି ଭକ୍ତି ଆହ୍ବାନ କରେ, ଏବଂ ସେହି ଅଂଶଗୁଡ଼ିକୁ ଗାନ କରିବାକୁ ବାଧ୍ୟତାମୂଳକ କରିବା ଦେଶର ଧର୍ମନିରପେକ୍ଷ ଚରିତ୍ରକୁ ଉଲ୍ଲଂଘନ କରୁଛି ବୋଲି କୃଷ୍ଣା ଉଲ୍ଲେଖ କରିଛନ୍ତି।ଆବେଦନରେ କୁହାଯାଇଛି ଯେ, ଜାତୀୟ ସମ୍ମାନ ଅପମାନ ନିବାରଣ ଆଇନ ଅଧୀନରେ ବନ୍ଦେ ମାତରମ୍କୁ ଅନ୍ତର୍ଭୁକ୍ତ କରିବା ପାଇଁ ସଂଶୋଧନ ଏକାନ୍ତ ସ୍ୱେଚ୍ଛାଚାରୀ ଏବଂ ବ୍ୟକ୍ତିଗତ ସ୍ୱାଧୀନତାର ଉଲ୍ଲଂଘନ କରୁଛି ଏବଂ ଏକ ସଂଖ୍ୟାଗରିଷ୍ଠ ଧାର୍ମିକ ବାର୍ତ୍ତାକୁ ସୂଚିତ କରୁଛି।
ସୁପ୍ରିମକୋର୍ଟ କହିଛନ୍ତି, ବନ୍ଦେ ମାତରମ୍ ଜାତୀୟ ସଙ୍ଗୀତ। ଏହା ସହ ସମ୍ବିଧାନର ଧାରା ୨୫ ଏବଂ ୨୬ ଅନୁଯାୟୀ ମୌଳିକ ଅଧିକାର ସମ୍ପର୍କରେ ଦଣ୍ଡନୀୟ ପରିଣାମ ସମ୍ପର୍କରେ ବିଚାର କରାଯିବା ଜରୁରୀ। ସମ୍ବିଧାନର ଏହି ଧାରା ଧର୍ମ ସ୍ୱାଧୀନତାର ମୌଳିକ ଅଧିକାରକୁ ସୁନିଶ୍ଚିତ କରେ, ବ୍ୟକ୍ତିଗତ ଏବଂ ସାମୂହିକ ଧାର୍ମିକ ସ୍ୱାଧୀନତାକୁ ସୁରକ୍ଷା ଦିଏ।
