ଜାମ୍ମୁ : ଜାମ୍ମୁ-କାଶ୍ମୀରର ପୁଞ୍ଚ୍ ଜିଲ୍ଲାରେ ବଡ଼ ଧରଣର ଆଇଇଡ଼ି ବିସ୍ଫୋରଣ । ଭୟଙ୍କର ବିସ୍ଫୋରଣରେ ୪ ପାକିସ୍ତାନୀ ଆତଙ୍କୀଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ପୁଞ୍ଚ୍ ଜିଲ୍ଲାର କୃଷ୍ଣା ଘାଟି ସେକ୍ଟର LoCର ଜିରୋ ଲାଇନ୍ ନିକଟ ସତୱାଲ-ନାକି ଅଞ୍ଚଳରେ ଏହି ଶକ୍ତିଶାଳୀ ବିସ୍ଫୋରଣ ହୋଇଛି। LoC ର ପାକିସ୍ତାନ ପାର୍ଶ୍ୱରେ କିଛି ଲୋକ ଯାତାୟାତ କରୁଥିବା ସମୟରେ ସନ୍ଦିଗ୍ଧ ଆଇଇଡ଼ି ବିସ୍ଫୋରଣ ହୋଇଥିବା କୁହାଯାଉଛି।
ଅପରପକ୍ଷେ ସୀମାନ୍ତ ଅଞ୍ଚଳରେ ବିସ୍ଫୋରଣ ଯୋଗୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ଭାରତୀୟ ସୀମା ସୁରକ୍ଷା ବଳ ସମଗ୍ର ସେକ୍ଟରରେ ଆଲର୍ଟ ଜାରି କରିଛନ୍ତି। ସୀମାରେ ଯେପରି କୌଣସି ଅନୁପ୍ରବେଶ ବା ସୁରକ୍ଷା ଉଲ୍ଲଂଘନ ନହୁଏ, ସେଥିପାଇଁ LoC ଅଞ୍ଚଳରେ ସତର୍କତା ଜାରି କରାଯାଇଛି। ଏଇ ନିକଟରେ ପୁଞ୍ଚ୍ ର ମେଣ୍ଢର ସେକ୍ଟର ବସୋନି ଅଞ୍ଚଳରେ ଟ୍ରାକ୍ ନିର୍ମାଣ କାର୍ଯ୍ୟ ଚାଲିଥିବା ବେଳେ ସେନା ବାହିନୀ ଦୁଇଟି ପୁରୁଣା ବାରୁଦ ସୁରଙ୍ଗ ଉଦ୍ଧାର କରିଥିଲେ। ଯାହାକୁ ପରେ ସେନା ବିଶେଷଜ୍ଞଙ୍କ ଦ୍ୱାରା ନିୟନ୍ତ୍ରିତ ବିସ୍ଫୋରଣ ମାଧ୍ୟମରେ ନଷ୍ଟ କରାଯାଇଛି।
