ନୂଆଦିଲ୍ଲୀ : ଜାତୀୟ ମେଡିକାଲ ପ୍ରବେଶିକା ପରୀକ୍ଷା ନିଟ- ୟୁଜି ର ପ୍ୟାଟର୍ନରେ ବଡ଼ ପରିବର୍ତ୍ତନ ପାଇଁ ପ୍ରସ୍ତୁତି ଚାଲିଛି। କେନ୍ଦ୍ର ସରକାର ସୁପ୍ରିମ୍ କୋର୍ଟରେ ଆଫିଡେଭିଟ୍ ଦାଖଲ କରି ଏହି ସୂଚନା ଦେଇଛନ୍ତି। ଏଥିରେ ଜଣାଯାଇଛି ଯେ, ପ୍ରାୟ ୨୨ ଲକ୍ଷ ପରୀକ୍ଷାର୍ଥୀ ଦେଉଥିବା ଏହି ପରୀକ୍ଷାକୁ ବର୍ତ୍ତମାନର ପେନ୍-ପେପର୍ ମୋଡ୍ରୁ ହଟାଇ କମ୍ପ୍ୟୁଟର ବେସ୍ଡ୍ ଟେଷ୍ଟରେ ପରିଣତ କରିବାର ବିକଳ୍ପ ଉପରେ ଗମ୍ଭୀରତାର ସହ ବିଚାର କରାଯାଉଛି। ଏହା ସହିତ ଜେଇଇ ଭଳି ନିଟ- ୟୁଜି କୁ ମଧ୍ୟ ଦୁଇଟି ପର୍ଯ୍ୟାୟ, ମେନ୍ ଏବଂ ଆଡଭାନ୍ସଡରେ ଆୟୋଜନ କରିବାକୁ ବିଚାର ଚାଲିଛି। ଏହି ବର୍ଷର ନିଟ୍ ପରୀକ୍ଷାର ପ୍ରଶ୍ନପତ୍ର ଲିକ୍ ପରେ ଦାଖଲ ହୋଇଥିବା ପିଟିସନ୍ଗୁଡ଼ିକର ଉତ୍ତର ଦେଇ ସରକାର ଜଣାଇଛନ୍ତି ଯେ, ନେସନାଲ ଟେଷ୍ଟିଂ ଏଜେନ୍ସି ର ୮ଟି ମୁଖ୍ୟ ପରୀକ୍ଷା ମଧ୍ୟରୁ ୭ଟି ପୂର୍ବରୁ ହିଁ ଅନଲାଇନ୍ ମୋଡ୍ରେ ଆୟୋଜିତ ହେଉଛି।୬ ଅଗଷ୍ଟରେ ହେବାକୁ ଥିବା ଶୁଣାଣି ପୂର୍ବରୁ ଦାଖଲ ଏହି ଆଫିଡେଭିଟ୍ରେ କେନ୍ଦ୍ର ସୁପ୍ରିମ୍ କୋର୍ଟଙ୍କୁ ଏହା ମଧ୍ୟ ଜଣାଇଛି ଯେ, ପରୀକ୍ଷା ପ୍ରଣାଳୀରେ କୌଣସି ବଡ଼ ପରିବର୍ତ୍ତନ ହଠାତ୍ ଲାଗୁ କରାଯିବ ନାହିଁ। ଛାତ୍ରଛାତ୍ରୀଙ୍କୁ ନୂଆ ପ୍ୟାଟର୍ନ ବିଷୟରେ ପର୍ଯ୍ୟାପ୍ତ ସମୟ ପୂର୍ବରୁ ସୂଚନା ଦିଆଯିବ, ଯାହାଦ୍ୱାରା ସେମାନଙ୍କୁ ନୂଆ ବ୍ୟବସ୍ଥା ଅନୁସାରେ ପ୍ରସ୍ତୁତି କରିବା ପାଇଁ ପୂରା ସୁଯୋଗ ମିଳିପାରିବ।
ଏହି ବିସ୍ତୃତ ଆଫିଡେଭିଟ୍ରେ ପରୀକ୍ଷାର ସୁରକ୍ଷା ବ୍ୟବସ୍ଥାକୁ ନେଇ ମଧ୍ୟ ସୂଚନା ଦିଆଯାଇଛି। ପ୍ରଶ୍ନପତ୍ର ଲିକ୍ ଏବଂ ଅନ୍ୟାନ୍ୟ ଅନିୟମିତତାକୁ ରୋକିବା ପାଇଁ ନୂଆ ଆଇନ ସହ କେତେକ ବୈଷୟିକ ଓ ପ୍ରଶାସନିକ ପଦକ୍ଷେପ ଲାଗୁ କରାଯାଇଛି।
