ମୁମ୍ବାଇ : ବଲିଉଡ ଅଭିନେତ୍ରୀ ପ୍ରୀତି ଜିଣ୍ଟା ଏବେ ତାଙ୍କ ଆଗାମୀ ଫିଲ୍ମ ‘ଭାଇବ’କୁ ନେଇ ଚର୍ଚ୍ଚାରେ ଅଛନ୍ତି। ଏହି ଫିଲ୍ମର ପ୍ରମୋସନ୍ରେ ବ୍ୟସ୍ତ ଥିବା ପ୍ରୀତି ନିକଟରେ ଏକ ସାକ୍ଷାତକାରରେ ନିଜ ବିଷୟରେ ଏକ ରୋଚକ କଥା କହିଛନ୍ତି।
ପ୍ରୀତି କୁହନ୍ତି, ସେ ନିଜକୁ ବଡ଼ ପରଦାରେ ଦେଖିବାକୁ ଆଦୌ ପସନ୍ଦ କରନ୍ତି ନାହିଁ। ଫିଲ୍ମ ସରିବା ପରେ ସେ ନିଜ ଫିଲ୍ମକୁ ପୁଣି ଦେଖନ୍ତି ନାହିଁ। ପରଦାରେ ନିଜକୁ ଦେଖିବା ତାଙ୍କୁ ଅଜବ ଲାଗେ। ପ୍ରତ୍ୟେକ ଥର ତାଙ୍କୁ ଲାଗେ ଯେ କୌଣସି ଦୃଶ୍ୟକୁ ସେ ଆହୁରି ଭଲ ଭାବେ କରିପାରିଥାନ୍ତେ।
‘ଭାଇବ’ରେ ପ୍ରୀତି ‘ମ୍ୟାଡାମ ଏଚ’ ନାମକ ଜଣେ ସୁପର ସ୍ପାଇ ଭୂମିକାରେ ନଜର ଆସିବେ। ଫିଲ୍ମରେ ସେ କୁନାଲ ଖେମୁ ଓ ସ୍ପର୍ଶ ଶ୍ରୀବାସ୍ତବଙ୍କ ସହ ମିଶି ଏକ ଗୁପ୍ତ ମିଶନ ପାଇଁ ପ୍ରସ୍ତୁତ କରୁଥିବା ଦେଖିବାକୁ ମିଳିବ। ଫିଲ୍ମରେ ପ୍ରୀତି ଅନେକ ଆକ୍ସନ ସିନ ଓ ଷ୍ଟଣ୍ଟ କରିଛନ୍ତି। ଶୁଟିଂ ସମୟରେ ତାଙ୍କୁ କିକ ଓ ମୁକ୍କା ମଧ୍ୟ ଖାଇବାକୁ ପଡ଼ିଥିଲା ବୋଲି ପ୍ରୀତି କହିଛନ୍ତି।
‘ଭାଇବ’ରେ ପ୍ରୀତି ଜିଣ୍ଟା, କୁନାଲ ଖେମୁ ଓ ସ୍ପର୍ଶ ଶ୍ରୀବାସ୍ତବଙ୍କ ବ୍ୟତୀତ ଦିନେଶ ଲାଲ ଯାଦବ ଓ ଯଶପାଲ ଶର୍ମା ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ରହିଛନ୍ତି। ଶର୍ମିଳା ଟାଗୋର ଫିଲ୍ମରେ କ୍ୟାମିଓ ଭୂମିକାରେ ନଜର ଆସିବେ। କୁନାଲ ଖେମୁ ଓ ଚିରାଗ ନିହଲାନୀଙ୍କ ପ୍ରଯୋଜନାରେ ନିର୍ମିତ ଏହି ଫିଲ୍ମର ନିର୍ଦ୍ଦେଶନା ମଧ୍ୟ କୁନାଲ ଖେମୁ ଦେଇଛନ୍ତି।
‘ଭାଇବ’ ୧୮ ସେପ୍ଟେମ୍ବର ୨୦୨୬ରେ ସିନେମା ହଲ୍ରେ ମୁକ୍ତିଲାଭ କରିବ।
