ବ୍ରିଟେନ୍ : ପ୍ରଥମେ ପ୍ରଧାନମନ୍ତ୍ରୀ ପଦରୁ ଇସ୍ତଫା, ଏବେ ସାଂସଦ ପଦ ବି ଛାଡ଼ିଲେ। ମାତ୍ର ୭୧ ଦିନ ଭିତରେ ଦୁଇଟି ବଡ଼ ଦାୟିତ୍ୱରୁ ମୁକ୍ତ ହୋଇଛନ୍ତି ବ୍ରିଟେନ୍ର ପୂର୍ବତନ ପ୍ରଧାନମନ୍ତ୍ରୀ କିର୍ ଷ୍ଟାର୍ମର। ବ୍ରିଟେନ୍ ରାଜନୀତିରେ ପୁଣି ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ପୂର୍ବତନ ପ୍ରଧାନମନ୍ତ୍ରୀ କିର୍ ଷ୍ଟାର୍ମର ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବାର ମାତ୍ର ୭୧ ଦିନ ପରେ ଏବେ ସାଂସଦ ପଦ ମଧ୍ୟ ଛାଡ଼ିବାକୁ ଘୋଷଣା କରିଛନ୍ତି। ତାଙ୍କ ଏହି ନିଷ୍ପତ୍ତି ବ୍ରିଟେନ୍ର ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।
ଷ୍ଟାର୍ମର କହିଛନ୍ତି ଯେ, ଏବେ ସେ ଆନ୍ତର୍ଜାତୀୟ ପ୍ରସଙ୍ଗ ସହିତ ମହିଳା ଓ ଝିଅମାନଙ୍କ ବିରୋଧରେ ହେଉଥିବା ହିଂସା ରୋକିବା ଭଳି ଗୁରୁତ୍ୱପୂର୍ଣ୍ଣ ମୁଦ୍ଦା ଉପରେ କାମ କରିବାକୁ ଚାହୁଁଛନ୍ତି। ସାଂସଦ ପଦରୁ ତାଙ୍କ ଇସ୍ତଫା ପରେ ଲଣ୍ଡନର ହୋଲବର୍ଣ୍ଣ ଆଣ୍ଡ ସେଣ୍ଟ ପାନକ୍ରାସ୍ ଆସନରେ ଉପନିର୍ବାଚନ ହେବ। ଷ୍ଟାର୍ମର ୨୦୧୫ ମସିହାରୁ ଏହି ଆସନର ପ୍ରତିନିଧିତ୍ୱ କରିଆସୁଥିଲେ। ଦୀର୍ଘ ସମୟ ଧରି ଏହି ଆସନକୁ ଲେବର ପାର୍ଟିର ମଜବୁତ ଗଡ଼ ବୋଲି ଧରାଯାଏ। ୨୦୨୪ ସାଧାରଣ ନିର୍ବାଚନରେ ଷ୍ଟାର୍ମର ଏଠାରୁ ୧୧ ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଥିଲେ। ୧୧ ବର୍ଷ ଧରି ଏହି ଅଞ୍ଚଳର ପ୍ରତିନିଧିତ୍ୱ କରିବା ତାଙ୍କ ପାଇଁ ବଡ଼ ସମ୍ମାନ ଓ ଗର୍ବର ବିଷୟ ଥିଲା। ଏବେ ଏହି ଦାୟିତ୍ୱକୁ ନୂଆ ଉତ୍ତରାଧିକାରୀଙ୍କୁ ଦେବାର ସମୟ ଆସିଛି ବୋଲି ସେ କହିଛନ୍ତି। ସାଂସଦ ପଦ ଛାଡ଼ିବା ପରେ ତାଙ୍କର ମୁଖ୍ୟ ଫୋକସ୍ ଡିଫେନ୍ସ, ସୁରକ୍ଷା, ବାଣିଜ୍ୟ ଓ ପ୍ରଯୁକ୍ତିବିଦ୍ୟା ସମେତ ବିଭିନ୍ନ ଆନ୍ତର୍ଜାତୀୟ ପ୍ରସଙ୍ଗ ଉପରେ ରହିବ।
ଏଥିସହ ମହିଳା ଓ ଝିଅମାନଙ୍କ ବିରୋଧରେ ହିଂସା ରୋକିବା ଦିଗରେ ମଧ୍ୟ ସେ କାମ ଜାରି ରଖିବେ।
