ନୂଆଦିଲ୍ଲୀ : ସଂସଦ ଭବନ ପରିସରରେ ଗେରୁଆ ବସ୍ତ୍ର ପିନ୍ଧି ‘ଚାନ୍ଦା ଚୋରି’ ପ୍ରତିବାଦ ନାଟକ କରିବାରୁ ବିହାରର ପୂର୍ଣ୍ଣିଆ ସାଂସଦ ପପୁ ଯାଦବ ବଡ଼ ଅଡ଼ୁଆରେ ଫସିଯାଇଛନ୍ତି। ଏହି ପ୍ରତିବାଦକୁ ନେଇ ଦିଲ୍ଲୀର ଜାହାଙ୍ଗୀରପୁରୀ ଥାନାରେ ଏତଲା ଦାୟର ହୋଇଥିବାବେଳେ ସାଧୁସନ୍ଥ ଏବଂ ହିନ୍ଦୁ ସଂଗଠନମାନେ ତୀବ୍ର ପ୍ରତିବାଦ କରିଛନ୍ତି। ଅଭିଯୋଗରେ ଦର୍ଶାଯାଇଛି ଯେ ପପୁ ଯାଦବ ନାଟକ କରି ଭଗବାନ ବସ୍ତ୍ର, ରାମ ମନ୍ଦିରର ପ୍ରତୀକାତ୍ମକ ଦାନ ପେଟିକା ଏବଂ ଭଗବାନ ରାମଙ୍କ ସହିତ ଜଡ଼ିତ ପ୍ରତୀକଗୁଡ଼ିକର ବ୍ୟବହାର କରି ଧାର୍ମିକ ଭାବନାକୁ ଆହତ କରିଛନ୍ତି। ଗଣମାଧ୍ୟମ ଏବଂ ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ସାଂସଦ ପପୁ ଯାଦବ ସାଧୁ ପୋଷାକ ପିନ୍ଧି ଚୋରର ଭୂମିକା ଅଭିନୟ କରିଥିଲେ। ଏହି ସମୟରେ ଅନେକ କଂଗ୍ରେସ ସାଂସଦ ସେହି ନାଟକର ବେଶ ଆନନ୍ଦ ମଧ୍ୟ ଉଠାଇଥିଲେ।
