ମୁମ୍ବାଇ : ବ୍ୟବସାୟୀ ବିଜୟ ମାଲ୍ୟା ଓ ବ୍ୟାଙ୍କଗୁଡ଼ିକ ମଧ୍ୟରେ ଚାଲିଥିବା ସମ୍ପତ୍ତି ବିବାଦକୁ ନେଇ ବମ୍ବେ ହାଇକୋର୍ଟ ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି। ପ୍ରାୟ ୧୦ ବର୍ଷ ଧରି ଚାଲିଥିବା ଏହି ବାଣିଜ୍ୟିକ ବିବାଦକୁ ଏବେ ଏକ ଯୁକ୍ତିସଙ୍ଗତ ନିଷ୍ପତ୍ତିରେ ପହଞ୍ଚାଇବା ଆବଶ୍ୟକ ବୋଲି କୋର୍ଟ କହିଛନ୍ତି।
ବିଜୟ ମାଲ୍ୟାଙ୍କ ବିରୋଧରେ ପୂର୍ବତନ କିଙ୍ଗଫିଶର ଏୟାରଲାଇନ୍ସ ପାଇଁ ବିଭିନ୍ନ ବ୍ୟାଙ୍କରୁ ନିଆଯାଇଥିବା ପ୍ରାୟ ୯,୦୦୦ କୋଟି ଟଙ୍କାର ଋଣ ଡିଫଲ୍ଟ ମାମଲା ରହିଛି। ୨୦୧୬ରେ ସେ ଭାରତ ଛାଡ଼ି ବ୍ରିଟେନ୍ ଚାଲିଯାଇଥିଲେ। ୨୦୧୯ରେ ତାଙ୍କୁ ‘ଫ୍ୟୁଜିଟିଭ୍ ଇକୋନୋମିକ୍ ଅଫେଣ୍ଡର’ ବା ପଳାତକ ଆର୍ଥିକ ଅପରାଧୀ ଘୋଷଣା କରାଯାଇଥିଲା। ଏହାପରେ ଆଇନ ଅନୁଯାୟୀ ତାଙ୍କ ସମ୍ପତ୍ତି ଜବତ କରିବାର ରାସ୍ତା ଖୋଲିଥିଲା। ୨୦୨୦ରେ ମାଲ୍ୟା ଏକ ବିଶେଷ ପିଏମଏଲଏ କୋର୍ଟଙ୍କ ରାୟକୁ ଚ୍ୟାଲେଞ୍ଜ କରିଥିଲେ। ଏହି ରାୟରେ ଏସ୍ବିଆଇ ନେତୃତ୍ୱାଧୀନ ବ୍ୟାଙ୍କଗୁଡ଼ିକର କନସୋର୍ଟିୟମ୍କୁ ଇଡି ଦ୍ୱାରା ଜବତ ହୋଇଥିବା ମାଲ୍ୟାଙ୍କ ସମ୍ପତ୍ତି ବ୍ୟବହାର କରିବାର ଅନୁମତି ଦିଆଯାଇଥିଲା। ଏହି ମାମଲାର ଶୁଣାଣି ସମୟରେ ଜଷ୍ଟିସ୍ ମିଲିନ୍ଦ ଯାଧବଙ୍କ ଖଣ୍ଡପୀଠ କହିଛନ୍ତି ଯେ ବିବାଦକୁ ଆହୁରି ଲମ୍ବା କରିବା ପରିବର୍ତ୍ତେ ପକ୍ଷଗୁଡ଼ିକୁ ବ୍ୟବହାରିକ ସମାଧାନ ଆଡ଼କୁ ଯିବା ଦରକାର।
