ନୂଆଦିଲ୍ଲୀ : ନିର୍ବାଚନ କମିଶନଙ୍କ ଏସଆଇଆରକୁ ନେଇ ଦେଶର ରାଜନୀତିରେ ଝଡ଼, ସ୍ୱତନ୍ତ୍ର ସଘନ ସଂଶୋଧନକୁ କେନ୍ଦ୍ର କରି ତେଜିଲା ବିବାଦ। ଦିଲ୍ଲୀ, ମହାରାଷ୍ଟ୍ର, କର୍ଣ୍ଣାଟକ, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ଭଳି ରାଜ୍ୟରେ ଲକ୍ଷ ଲକ୍ଷ ଭୋଟରଙ୍କ ନାମ ଭୋଟର ତାଲିକାରୁ ବାଦ ଦେବା ପାଇଁ ବିରୋଧୀ ଦଳଗୁଡ଼ିକ ନିର୍ବାଚନ କମିଶନଙ୍କୁ କଡ଼ା ସମାଲୋଚନା କରିଛନ୍ତି।
ସେମାନେ ଅଭିଯୋଗ କରିଛନ୍ତି ଯେ ଏହା ବିଜେପି ଜିତିବା ଏବଂ ବିରୋଧୀ ସମର୍ଥକଙ୍କ ଭୋଟ ଅଧିକାର ଛଡ଼ାଇ ନେବା ପାଇଁ ଏକ ଷଡ଼ଯନ୍ତ୍ର।ଇଣ୍ଡିଆନ ଏକ୍ସପ୍ରେସରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଝାଡ଼ଖଣ୍ଡର ଗୋଡ୍ଡା ଅଞ୍ଚଳରେ ଜଣେ ବିଜେପି ବୁଥ୍ ସ୍ତରୀୟ ଏଜେଣ୍ଟ ଫର୍ମ-୭ ମାଧ୍ୟମରେ ଏକ ସମ୍ପ୍ରଦାୟର ଭୋଟରଙ୍କ ନାମ ବାଦ ଦେବାକୁ ଚେଷ୍ଟା କରିଥିଲେ।ଘଟଣାସ୍ଥଳରେ ଉପସ୍ଥିତ ବୁଥ୍ ସ୍ତରୀୟ ଅଧିକାରୀ ଆବେଦନଗୁଡ଼ିକୁ ଗ୍ରହଣ କରିବାକୁ ମନା କରି ସେଗୁଡ଼ିକୁ ଭୁଲ ବୋଲି କହିଥିଲେ। ଅଭିଯୋଗ ହେଉଛି ଯେ ପିଢ଼ି ପରେ ପିଢ଼ି ସେଠାରେ ରହୁଥିବା ଏବଂ ୨୦୦୩ ଭୋଟର ତାଲିକାରେ ପୂର୍ବରୁ ଯାଞ୍ଚ ହୋଇଥିବା ଲୋକଙ୍କ ନାମ ବାଦ ଦେବା ପାଇଁ ଏହି ପ୍ରୟାସ କରାଯାଇଥିଲା।
