ବରଗଡ଼ : ଓଡ଼ିଶାର ଶିକ୍ଷା ଓ ସାଂସ୍କୃତିକ କ୍ଷେତ୍ରର ବିକାଶ ପାଇଁ ରାଜ୍ୟ ସରକାର ଅନେକ ନୂତନ ଏବଂ ଯୁଗାନ୍ତକାରୀ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ଏହି ଯୋଜନାଗୁଡ଼ିକର ମୂଳ ଉଦ୍ଦେଶ୍ୟ ହେଉଛି ଓଡ଼ିଆ ଭାଷା, ସଂସ୍କୃତିର ସୁରକ୍ଷା କରିବା ସହିତ ରାଜ୍ୟର ଶିକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ ଓ ଗୁଣାତ୍ମକ କରିବା।
ରାଜ୍ୟପାଳ ସକାଳ ୧୦ଟାରେ ଅତାବିରା ଆନନ୍ଦ କଲ୍ୟାଣ ମଣ୍ଡପରେ ଆୟୋଜିତ କୋଶଳ ଆନ୍ଧ୍ର ସାଂସ୍କୃତିକ ଅନୁଷ୍ଠାନର ୨୨ତମ ବାର୍ଷିକ ଉତ୍ସବରେ ଯୋଗଦେବେ। ଏହି ଅବସରରେ ସେ ଅନୁଷ୍ଠାନର ସାଂସ୍କୃତିକ ପରମ୍ପରା, କଳା ଓ ସାହିତ୍ୟର ବିକାଶ ନେଇ ଉପସ୍ଥିତ ଅତିଥି ଓ ଅଞ୍ଚଳବାସୀଙ୍କ ସହ ଭାବ ବିନିମୟ କରିବେ।
ପରେ ଅପରାହ୍ନ ୩ଟାରେ ରାଜ୍ୟପାଳ ଅତାବିରା ବ୍ଲକ୍ର ଲରାସରା ପଞ୍ଚାୟତ ଅନ୍ତର୍ଗତ ନୂଆଁଖଇରପାଲିସ୍ଥିତ କୋଶଳ ସ୍କୁଲରେ ପହଞ୍ଚିବେ। ସେଠାରେ ‘ବୋଇଂ ସୁକନ୍ୟା ପ୍ରୋଗ୍ରାମ’ ଅଧୀନରେ ଏସ୍ଟିଇଏମ୍ ଲାବ ଏବଂ ଏରୋମୋଡେଲିଂ ଟ୍ରେନିଂ ସେଣ୍ଟରର ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି।
ଏହି ଲାବ ଓ ଟ୍ରେନିଂ ସେଣ୍ଟର ମାଧ୍ୟମରେ ଛାତ୍ରୀଛାତ୍ରଙ୍କ ମଧ୍ୟରେ ବିଜ୍ଞାନ, ପ୍ରଯୁକ୍ତି, ଇଞ୍ଜିନିୟରିଂ ଓ ଗଣିତ ପ୍ରତି ଆଗ୍ରହ ବଢ଼ିବା ସହ ଏରୋମୋଡେଲିଂ ଭଳି ଆଧୁନିକ ଶିକ୍ଷାଭିତ୍ତିକ କାର୍ଯ୍ୟକଳାପରେ ନୂଆ ସୁଯୋଗ ସୃଷ୍ଟି ହେବ ବୋଲି ଆଶା କରାଯାଉଛି।
ଉଦ୍ଘାଟନୀ କାର୍ଯ୍ୟକ୍ରମ ପରେ ରାଜ୍ୟପାଳ ଛାତ୍ରୀଛାତ୍ର, ଅଭିଭାବକ, ଶିକ୍ଷୟିତ୍ରୀ-ଶିକ୍ଷକ ଏବଂ ସମବେତ ଶିକ୍ଷାପ୍ରେମୀଙ୍କୁ ଉଦ୍ବୋଧନ ଦେବେ। ରାଜ୍ୟପାଳଙ୍କ ଗସ୍ତକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଉତ୍ସାହ ଓ ଆଗ୍ରହ ପ୍ରକାଶ ପାଇଛି।
