ଲକ୍ଷ୍ନୌ: ଉତ୍ତରପ୍ରଦେଶରେ ୨୦୨୭ ବିଧାନସଭା ନିର୍ବାଚନର ତାତି ଏବେଠାରୁ ଅନୁଭବ ହେବାକୁ ଲାଗିଲାଣି। ବିଜେପି ନିଜ ସାଂଗଠନିକ ପ୍ରସ୍ତୁତିକୁ ବୁଥ୍ ସ୍ତରକୁ ନେବା ଆରମ୍ଭ କରିଛି। ଏହି କ୍ରମରେ ଆଜି ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ।
ପ୍ରଧାନମନ୍ତ୍ରୀଙ୍କ ବାସଭବନରେ ହୋଇଛି ଏହି ସାକ୍ଷାତକାର। ପ୍ରାୟ ଏକ ଘଣ୍ଟା ଧରି ଦୁଇ ନେତାଙ୍କ ମଧ୍ୟରେ ଆଲୋଚନା ହୋଇଥିବା ରିପୋର୍ଟ ରହିଛି। ତେବେ ବୈଠକରେ କେଉଁ କେଉଁ ପ୍ରସଙ୍ଗ ଉପରେ ବିସ୍ତୃତ ଆଲୋଚନା ହେଲା, ସେନେଇ ସରକାରୀ ଭାବେ ସବିଶେଷ ସୂଚନା ସାମ୍ନାକୁ ଆସିନାହିଁ।
ନିର୍ବାଚନୀ ପ୍ରସ୍ତୁତିରେ ବିଜେପି ଏବେ ବୁଥ୍ ସ୍ତରରେ ସାମାଜିକ ପ୍ରତିନିଧିତ୍ୱ ବଢ଼ାଇବା ଉପରେ ଗୁରୁତ୍ୱ ଦେଉଛି। ଦଳର ଯୋଜନା ଅନୁସାରେ, କୌଣସି ବୁଥ୍ରେ ଯେତେ ସାମାଜିକ ବର୍ଗର ଉପସ୍ଥିତି ରହିଛି, ବୁଥ୍ କମିଟିରେ ସେହି ବର୍ଗର ଲୋକଙ୍କୁ ପ୍ରତିନିଧିତ୍ୱ ଦେବା ଉପରେ ଜୋର ଦିଆଯିବ। ଅର୍ଥାତ୍ ଯେଉଁ ସମାଜ ସହ ଦଳ ସିଧାସଳଖ ସମ୍ପର୍କ ବଢ଼ାଇବାକୁ ଚାହୁଁଛି, ସେହି ସମାଜର ଲୋକଙ୍କୁ ସଂଗଠନରେ ଦାୟିତ୍ୱ ଦେବା ରଣନୀତି ଆପଣାଇବାକୁ ଯୋଜନା ରହିଛି। ଏହା ମାଧ୍ୟମରେ ସ୍ଥାନୀୟ ସ୍ତରରେ ବିଭିନ୍ନ ସାମାଜିକ ଗୋଷ୍ଠୀ ସହ ସଂପର୍କ ମଜବୁତ କରିବାକୁ ଦଳ ଚାହୁଁଛି।
