ଭୁବନେଶ୍ୱର : ଆଜି ପୂର୍ବତନ ମୁଖ୍ୟମନ୍ତ୍ରୀ, ବିରୋଧୀ ଦଳ ନେତା ତଥା ବିଜେଡ଼ି ସଭାପତି ନବୀନ ପଟ୍ଟନାୟକଙ୍କ ଜନ୍ମଦିନ। ଦୀର୍ଘ ୨୪ ବର୍ଷ ଧରି ଓଡ଼ିଶାବାସୀଙ୍କ ବିଶ୍ବାସ ଜିତିବାରେ ସକ୍ଷମ ହୋଇଥିବା ଏହି ରାଜନେତା ଆଜି ୮୦ ବର୍ଷରେ ପାଦ ଥାପିଛନ୍ତି । କ୍ରମାଗତ ଭାବେ ୫ ଥର ନିର୍ବାଚିତ ହୋଇ ୨୦୦୦ରୁ ୨୦୨୪ ଯାଏଁ ମୁଖ୍ୟମନ୍ତ୍ରୀ ଭାବେ କାର୍ଯ୍ୟଭାର ତୁଲାଇଥିଲେ ଏହି ନବୀନ।
ଆସ୍କାରୁ ସାଂସଦ, କେନ୍ଦ୍ରରେ ଖଣିମନ୍ତ୍ରୀ ଏବଂ ପରେ ୨୦୦୦ ମସିହାରୁ ଲଗାତାର ୨୪ ବର୍ଷ ଧରି ମୁଖ୍ୟମନ୍ତ୍ରୀ ରହି ସେ ଓଡ଼ିଶାର ‘ନେତା ନମ୍ବର-୧’ ଭାବେ ନିଜକୁ ପ୍ରତିଷ୍ଠିତ କରିଥିଲେ ।
୧୯୪୬ ମସିହା ଅକ୍ଟୋବର ୧୬ ତାରିଖରେ ଜନ୍ମିତ ନବୀନ ପଟ୍ଟନାୟକ ହେଉଛନ୍ତି ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ତଥା କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକଙ୍କ ପୁତ୍ର। ତେବେ, ଯୁବାବସ୍ଥାରେ ରାଜନୀତି ସହିତ ତାଙ୍କର କୌଣସି ସମ୍ପର୍କ ନଥିଲା। ସେ ଜଣେ ବିଶ୍ୱସ୍ତରୀୟ ଲେଖକ, ସାହିତ୍ୟାନୁରାଗୀ ଏବଂ କଳାପ୍ରେମୀ ଭାବରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ଦେହରାଦୁନର ‘ୱେଲହାମ୍ ବଏଜ୍ ସ୍କୁଲ୍’ ଏବଂ ‘ଦୁନ୍ ସ୍କୁଲ୍’ରେ ଶିକ୍ଷାଲାଭ କରିବା ପରେ, ସେ ଦିଲ୍ଲୀର ‘ସେଣ୍ଟ ଷ୍ଟିଫେନ୍ସ କଲେଜ’ରୁ ସ୍ନାତକ ଡିଗ୍ରୀ ହାସଲ କରିଥିଲେ। ସେହି ସମୟରେ, ଆମେରିକା ଏବଂ ୟୁରୋପର ଉଚ୍ଚସ୍ତରୀୟ ସାମାଜିକ ମହଲରେ ସେ ଜଣେ ଜଣାଶୁଣା ବ୍ୟକ୍ତିତ୍ୱ ହୋଇସାରିଥିଲେ।
୧୯୯୭ ମସିହାରେ ନିଜ ପିତା ବିଜୁ ପଟ୍ଟନାୟକଙ୍କ ଦେହାନ୍ତ ପରେ, ଓଡ଼ିଶାର ରାଜନୈତିକ କ୍ଷେତ୍ରରେ ଏକ ବିରାଟ ଶୂନ୍ୟତା ସୃଷ୍ଟି ହୋଇଥିଲା। ଏହି କଠିନ ସମୟରେ, ଜନସାଧାରଣଙ୍କ ଆହ୍ୱାନ ଏବଂ ଓଡ଼ିଶା ପ୍ରତି ଥିବା ଗଭୀର କର୍ତ୍ତବ୍ୟବୋଧ ନବୀନ ବାବୁଙ୍କୁ ରାଜନୀତିକୁ ଆଣିଥିଲା। ୧୯୯୭ ମସିହାରେ ସେ ଗଞ୍ଜାମର ଆସ୍କା ଲୋକସଭା ନିର୍ବାଚନ ମଣ୍ଡଳୀରୁ ସାଂସଦ ଭାବେ ନିର୍ବାଚିତ ହୋଇଥିଲେ ଏବଂ ପରବର୍ତ୍ତୀ ସମୟରେ ଅଟଳ ବିହାରୀ ବାଜପେୟୀଙ୍କ ନେତୃତ୍ୱାଧୀନ ସରକାରରେ କେନ୍ଦ୍ର ମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ।
୧୯୯୭ ମସିହା ଡିସେମ୍ବର ମାସରେ ସେ ‘ବିଜୁ ଜନତା ଦଳ’ ତଥା ବିଜେଡି ପ୍ରତିଷ୍ଠା କରିଥିଲେ। ଠିକ୍ ଦୁଇ ବର୍ଷ ପରେ, ୨୦୦୦ ମସିହାରେ ଓଡ଼ିଶାରେ ମହାବାତ୍ୟାଜନିତ ଭୟଙ୍କର ପରିସ୍ଥିତି ମଧ୍ୟରେ ହିଞ୍ଜିଳିରେ ବିଧାୟକ ଭାବେ ନିର୍ବାଚନ ଜିତି, ସେ ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ଏହା ସହିତ ଓଡ଼ିଶା ରାଜନୀତିରେ ଏକ ନୂତନ ସ୍ୱର୍ଣ୍ଣିମ ଅଧ୍ୟାୟର ଆରମ୍ଭ ହୋଇଥିଲା।
୨୦୦୦ ମସିହାରୁ ୨୦୨୪ ମସିହା ପର୍ଯ୍ୟନ୍ତ ପାଖାପାଖି ୨୪ ବର୍ଷ ଧରି ସେ ଓଡ଼ିଶାର ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ତୁଲାଇଥିଲେ ଏବଂ ଦେଶର ଦୀର୍ଘତମ ସମୟ ଧରି ମୁଖ୍ୟମନ୍ତ୍ରୀ ରହିଥିବା ବ୍ୟକ୍ତିମାନଙ୍କ ମଧ୍ୟରେ ନିଜର ସ୍ଥାନ ସୁନିଶ୍ଚିତ କରିଥିଲେ। ତାଙ୍କର ନିର୍ମଳ ଭାବମୂର୍ତ୍ତି, ଦୁର୍ନୀତି ବିରୋଧରେ ଦୃଢ଼ ଆଭିମୁଖ୍ୟ, ମହିଳା ସଶକ୍ତିକରଣ କାର୍ଯ୍ୟକ୍ରମ ଏବଂ ପ୍ରାକୃତିକ ବିପର୍ଯ୍ୟୟ ପରିଚାଳନାରେ ‘ଶୂନ୍ୟ ମୃତ୍ୟୁହାର’ ନୀତି ତାଙ୍କୁ ବିଶ୍ୱସ୍ତରୀୟ ପ୍ରଶଂସା ଆଣି ଦେଇଥିଲା।
ଯଦିଓ ୨୦୨୪ ନିର୍ବାଚନରେ ବିଜେଡି ପରାଜୟ ହୋଇଥିଲା, ତଥାପି ନବୀନ ପଟ୍ଟନାୟକଙ୍କ ଲୋକପ୍ରିୟତା ଏବଂ ଓଡ଼ିଶାବାସୀଙ୍କ ହୃଦୟରେ ତାଙ୍କ ପାଇଁ ଥିବା ସ୍ଥାନ ଆଦୌ କମିନାହିଁ। ଆଜି ନିଜ ଜୀବନର ୮୦ତମ ବର୍ଷରେ ପାଦ ଦେଇଥିବା ଏହି ମହାନ ନେତାଙ୍କ ପାଇଁ ଚାରିଆଡ଼ୁ ଶୁଭେଚ୍ଛାର ସୁଅ ଛୁଟିଛି।
