ଆଜିକାଲି ଦୃଶ୍ୟମାନ ସ୍ୱାସ୍ଥ୍ୟ ଭଲ ଥିଲେ ମଧ୍ୟ ଶରୀର ଭିତରେ ଅନେକ ରୋଗ ଗୁପ୍ତ ଭାବରେ ବୃଦ୍ଧି ପାଉଥାଏ, ଯାହା ସାଧାରଣତଃ ବାହାରୁ ଜଣାପଡ଼େ ନାହିଁ। ଏଭଳି ପରିସ୍ଥିତିରେ ଡାକ୍ତରମାନେ ଅନେକ ସମୟରେ ରୋଗର ପ୍ରକୃତ କାରଣ ଜାଣିବା ପାଇଁ ଏମଆରଆଇ (Magnetic Resonance Imaging) ସ୍କାନ୍ କରିବାକୁ ପରାମର୍ଶ ଦେଇଥାଆନ୍ତି।
ଏମଆରଆଇ ସ୍କାନ୍ କ’ଣ: ଏମଆରଆଇ ହେଉଛି ଏକ ଅତ୍ୟାଧୁନିକ ମେଡିକାଲ୍ ଟେଷ୍ଟ, ଯେଉଁଥିରେ ଶରୀରର ବିଭିନ୍ନ ଅଙ୍ଗର ସଠିକ୍ ଓ ସ୍ପଷ୍ଟ ଚିତ୍ର ପ୍ରସ୍ତୁତ କରାଯାଇଥାଏ। ଏହି ମେସିନ୍ ସାହାଯ୍ୟରେ ଡାକ୍ତରମାନେ ମସ୍ତିଷ୍କ, ମେରୁଦଣ୍ଡ, ମାଂସପେଶୀ, ସ୍ନାୟୁ ଏବଂ ହାଡ଼ ଭିତରେ ହେଉଥିବା ପରିବର୍ତ୍ତନଗୁଡ଼ିକୁ ସହଜରେ ଦେଖିପାରନ୍ତି।
ମସ୍ତିଷ୍କ ସମ୍ବନ୍ଧୀୟ ରୋଗ: ମସ୍ତିଷ୍କର ବିଭିନ୍ନ ସମସ୍ୟା ଯେପରିକି ବ୍ରେନ୍ ଟ୍ୟୁମର୍ , ଷ୍ଟ୍ରୋକ୍ , ମଲ୍ଟିପଲ୍ ସ୍କ୍ଲେରୋସିସ୍ ଏବଂ ମସ୍ତିଷ୍କରେ ପ୍ରଦାହ କିମ୍ବା ଫୁଲାକୁ ଜାଣିବା ପାଇଁ ଏହା ଅତ୍ୟନ୍ତ ଉପଯୋଗୀ।
ମେରୁଦଣ୍ଡ ଓ ସ୍ନାୟୁ ସମସ୍ୟା: ମେରୁଦଣ୍ଡ, ଡିସ୍କ ଏବଂ ପାଖାପାଖି ଥିବା ସ୍ନାୟୁଗୁଡ଼ିକର ଅବସ୍ଥା ଜାଣିବା ପାଇଁ ଏହି ସ୍କାନ୍ କରାଯାଏ। ସ୍ଲିପ୍ ଡିସ୍କ , ସ୍ପାଇନାଲ୍ କର୍ଡ ଜନିତ ସମସ୍ୟା ଏହା ଦ୍ୱାରା ଜଣାପଡ଼େ।
ମାଂସପେଶୀ ଓ କୋମଳ ତନ୍ତୁ ଆଘାତ: ଆଣ୍ଠୁ, କାନ୍ଧ, ବାହୁ ଏବଂ ଗଣ୍ଠିରେ ଯନ୍ତ୍ରଣା କିମ୍ବା ଆଘାତ ଲାଗିଲେ MRI କରାଯାଏ। ଖେଳାଳିଙ୍କ କ୍ଷେତ୍ରରେ ଲିଗାମେଣ୍ଟ୍ ସମସ୍ୟା କିମ୍ବା ମାଂସପେଶୀର ଆଘାତ ଜାଣିବା ପାଇଁ ଏହା ବେଶ୍ ସହାୟକ ହୋଇଥାଏ।
ଟ୍ୟୁମର୍ ଏବଂ କ୍ୟାନସର୍ ଚିହ୍ନଟ: ଶରୀରର ବିଭିନ୍ନ ଅଙ୍ଗରେ ଥିବା ଗଣ୍ଠି କିମ୍ବା ଟ୍ୟୁମର୍ ର ପ୍ରକୃତି ଏବଂ ଏହାର ପ୍ରଭାବ ଆଖପାଖର ଟିସୁ ଉପରେ କିପରି ପଡ଼ିଛି, ତାହା ଜାଣିବା ପାଇଁ ଡାକ୍ତରମାନେ ଏମଆରଆଇ ସ୍କାନ୍ ର ସାହାଯ୍ୟ ନେଇଥାଆନ୍ତି।
