ଲିମା : ଦକ୍ଷିଣ ଆମେରିକାର ପେରୁ ଅଞ୍ଚଳରେ ୬.୭ ତୀବ୍ରତାର ଶକ୍ତିଶାଳୀ ଭୂକମ୍ପର ଝଟକା । ଅନେକ ସହରରେ ଭୂକମ୍ପର ଝଟକା ଅନୁଭୂତ ହୋଇଥିବା ବେଳେ ଲୋକେ ଭୟରେ ଘର ଛାଡ଼ି ରାସ୍ତାକୁ ଦୌଡ଼ି ଆସିଥିଲେ। ତେବେ ବଡ଼ କଥା ହେଉଛି, ଏତେ ଶକ୍ତିଶାଳୀ ଭୂକମ୍ପ ସତ୍ତ୍ୱେ କୌଣସି ଜନହାନି କିମ୍ବା ସୁନାମି ବିପଦର ଖବର ମିଳିନାହିଁ। ଆମେରିକୀୟ ଭୂତାତ୍ତ୍ୱିକ ସର୍ଭେ ଅନୁସାରେ, ଭୂକମ୍ପ ସ୍ଥାନୀୟ ସମୟ ଅପରାହ୍ନ ୧ଟା ବେଳେ ଅନୁଭୂତ ହୋଇଥିଲା। ଏହାର କେନ୍ଦ୍ରସ୍ଥଳ ଅୟାକୁଚୋ ଅଞ୍ଚଳର ପାରିନାକୋଚାସ ପ୍ରାନ୍ତ ନିକଟରେ ଥିବା ବେଳେ ଭୂପୃଷ୍ଠରୁ ପ୍ରାୟ ୬୬.୭ କିଲୋମିଟର ତଳେ ଏହାର ଉତ୍ସ ଥିଲା। ଭୂକମ୍ପର ଗଭୀରତା ଅଧିକ ଥିବାରୁ ଏହାର ଝଟକା ଇକା, ଆରେକ୍ୱିପା ସମେତ ଅନେକ ଅଞ୍ଚଳରେ ଅନୁଭୂତ ହୋଇଥିଲା। ବିଶେଷଜ୍ଞଙ୍କ ମତରେ, ଗଭୀର କେନ୍ଦ୍ରସ୍ଥଳ ଥିବା ଭୂକମ୍ପ ସାଧାରଣତଃ ବହୁ ଦୂର ପର୍ଯ୍ୟନ୍ତ ଅନୁଭୂତ ହେଲେ ମଧ୍ୟ ଭୂପୃଷ୍ଠରେ କ୍ଷୟକ୍ଷତି ତୁଳନାମୂଳକ କମ୍ ହୋଇଥାଏ।ଭୂକମ୍ପ ପରେ ସ୍ଥାନୀୟ ପ୍ରଶାସନ ଓ ଜରୁରୀକାଳୀନ ସେବା ସଂସ୍ଥାଗୁଡ଼ିକ ତୁରନ୍ତ ସକ୍ରିୟ ହୋଇପଡ଼ିଥିଲେ। ପ୍ରଭାବିତ ଅଞ୍ଚଳରୁ ସୂଚନା ସଂଗ୍ରହ ଆରମ୍ଭ ହୋଇଥିବା ବେଳେ ସିଭିଲ୍ ଡିଫେନ୍ସ ଅଧିକାରୀମାନେ କହିଛନ୍ତି ଯେ, ଏପର୍ଯ୍ୟନ୍ତ କୌଣସି ବଡ଼ ଧରଣର କ୍ଷୟକ୍ଷତି କିମ୍ବା ଆହତଙ୍କ ସୂଚନା ମିଳିନାହିଁ। ସେହିପରି ପେରୁ ନୌସେନା ମଧ୍ୟ ସ୍ପଷ୍ଟ କରିଛି ଯେ ଏହି ଭୂକମ୍ପ ଯୋଗୁଁ ସୁନାମିର କୌଣସି ଆଶଙ୍କା ନାହିଁ। ପ୍ରକୃତରେ ପେରୁ ଭୂକମ୍ପ ପ୍ରବଣ ଦେଶ ଭାବେ ପରିଚିତ।
