ନୂଆଦିଲ୍ଲୀ: ‘ବେଷ୍ଟ-ବ୍ରୋକର୍ସ’ର ଏକ ନୂତନ ବିଶ୍ଳେଷଣ ଅନୁଯାୟୀ, ମେ ୨୦୨୪ରୁ ବିଶ୍ୱର ସବୁଠାରୁ ଧନୀ ବ୍ୟକ୍ତି ଭାବରେ ରହିଆସିଥିବା ଏଲନ ମସ୍କ ଜୁଲାଇ ୨୦୨୫ ରୁ ଜୁଲାଇ ୨୦୨୬ ମଧ୍ୟରେ ନିଜ ସମ୍ପତ୍ତିରେ ୩୨୦ ବିଲିୟନ୍ ଡଲାର (ଦୈନିକ ପ୍ରାୟ ୮୭୫ ନିୟୁତ ଡଲାର) ଯୋଡ଼ିଛନ୍ତି। ‘ଫୋର୍ବସ’ର ରିୟଲ-ଟାଇମ୍ ବିଲିୟନେୟାର ତାଲିକାକୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରାଯାଇଛି। ଜୁନ୍ ୧୨ରେ ସ୍ପେସ୍ଏକ୍ସ (SpaceX) ଆଇପିଓ ସାର୍ବଜନୀନ ହେବା ପରେ ମସ୍କ ବିଶ୍ୱର ପ୍ରଥମ ‘ଟ୍ରିଲିୟନେୟାର’ (ଲକ୍ଷେ କୋଟି ଡଲାରର ମାଲିକ) ହୋଇପାରିଥିଲେ। କିନ୍ତୁ ଗତମାସରେ ସେୟାର ମୂଲ୍ୟ ହ୍ରାସ ପାଇବା ପରେ ସେ ସେହି ଆଖ୍ୟା ହରାଇଛନ୍ତି।
ବର୍ତ୍ତମାନ ତାଙ୍କର ଆକଳନ କରାଯାଇଥିବା ସମ୍ପତ୍ତି ୬୯୦ ବିଲିୟନ୍ ଡଲାର ରହିଛି, ଯାହା ଗତ ଡିସେମ୍ବର ପରଠାରୁ ତାଙ୍କର ସବୁଠାରୁ କମ୍ ସମ୍ପତ୍ତି। ‘ବେଷ୍ଟ-ବ୍ରୋକର୍ସ’ର ଗବେଷକମାନେ ‘ୱେବ୍ୟାକ୍ ମେସିନ୍’ ବ୍ୟବହାର କରି ଜୁଲାଇ ୨୭, ୨୦୨୫ ଏବଂ ଜୁଲାଇ ୨୭, ୨୦୨୬ ମଧ୍ୟରେ ବିଶ୍ୱର ସବୁଠାରୁ ଧନୀ ବ୍ୟକ୍ତିମାନଙ୍କ ସମ୍ପତ୍ତିର ତୁଳନା କରି ଏହି ବାର୍ଷିକ ପରିବର୍ତ୍ତନ ହିସାବ କରିଛନ୍ତି। ଗୋଟିଏ ବର୍ଷରେ ଏ ଆଇ ଏବଂ ବୈଷୟିକ ଜ୍ଞାନକୌଶଳର ଦ୍ରୁତ ବିକାଶ ଯୋଗୁଁ ମସ୍କ, ମାଇକେଲ୍ ଡେଲ୍, ଲ୍ୟାରୀ ପେଜ୍, ସର୍ଜେଇ ବ୍ରିନ୍ ଏବଂ ଟେଦରର ଜିଆନକାର୍ଲୋ ଦେଭାସିନୀଙ୍କ ଭଳି ପ୍ରଯୁକ୍ତିବିଦ୍ୟା ଉଦ୍ୟୋଗୀମାନଙ୍କ ସମ୍ପତ୍ତିରେ ପ୍ରଚୁର ବୃଦ୍ଧି ଘଟିଛି ।
